CÉSAR IBAÑEZ PARÍS ETA JABI SANTA CRUZ AGIRRE, BLAS DE OTERO-VILLA DE BILBAO POESIA SARIAREN LAUGARREN EDIZIOAREN IRABAZLEAK

Gaztelaniako saria jaso duen “La ruta de la sed” lanean, epaimahaiko kideek txandakatze erritmikoak eta hizkuntza sinbolikoaren eta metaforikoaren erabilera egokia azpimarratu dituzte, gozotasuna eta indarra uztartzen dituen poema liburua, poesia une oro bizitzarekin lotuta dagoen lana sortzeko.

Euskarazko modalitatean saria lortu duen “Baso ilun itoan” lanean, epaimahaiko kideek hizkuntza aberatsa, zehatza eta musikatua azpimarratu dute.

Bilbon, 2012ko urtarrilaren 20an. Blas de Otero-Villa de Bilbao Poesia Sariaren laugarren edizioa, gaztelaniazko modalitatean. Sorian bizi den César Ibáñez París idazlearen “La ruta de la sed” lanak irabazi du. Euskaraz idatzitako lanen artean, Jabi Santa Cruz Agirre idazle bizkaitarraren “Baso ilun itoan” poesia liburua izan da irabazlea. Aurten lehiaketak hirukoiztu egin du partaide kopurua, eta, horrela, gaztelaniaz 241 lan aurkeztu dira, eta euskaraz 13. 2010eko edizioan 71 eta 5 aurkeztu ziren, hurrenez hurren.

Epaimahaiak aurkeztutako lanen kalitate handia eta maila poetikoa azpimarratu ditu, eta, horren ondorioz, oso denbora laburrean, sariketa egungo poesia panoramaren erreferente gisa finkatu da. Horrez gain, azpimarratu dute joera liriko guztietara zabaldik dagoen saria dela, aurkeztutako lanetan ikusten diren estetika eta gai anitzetan ikusten denez.

Sari banaketa ekitaldia GAUR, ostirala, eguerdian, ospatu da, Bilboko Udaleko Areto Arabiarrean, eta bertan Iñaki Azkuna Alkateak eta Ibone Bengoetxea, Kultura eta Hezkuntza zinegotzi eta epaimahaiko presidenteak hartu dute parte, epaimahaiko zenbait kidez eta azken edizio honetako sarituez gain.

Sabina De la Cruzekin, Blas de Otero Fundazioko presidente eta literatur sari honi izena ematen dion poetaren alargunarekin, batera, José Fernández de la Sota eta Luis Alberto Cuenca idazleak eta Juan José Lanz literatur kritikaria izan dira epaimahaiko kideak gaztelaniaz idatzitako lanen modalitatean.

Epaimahaiko kideen balorazioaren arabera, “La ruta de la sed” kalitatezko poema liburua da, edukiari zein formari dagokionez, eta azpimarragarriak dira txandakatze erritmikoak eta hizkuntza sinbolikoaren eta metaforikoaren erabilera egokia. Horrela, gozotasuna eta indarra uztartzen dituen poema liburua dela adierazi dute, poesia une oro bizitzarekin lotuta dagoen lana sortzeko. “La ruta de la sed”, iluntasunetik argira doazen hiru partetan dago banatuta, era naturalean, ironiarekin elkarbizitzen dakien bidean.

EUSKARAZ
Euskaraz idatzitako lanen arteko lan irabazleari dagokionez, Juan Ramón Madariagak, Miren Agur Meabek eta, Jon Kortazar idazle eta kritikariak osatutako epaimahaiak, hizkuntza aberatsa, zehatza eta musikatua azpimarratu du. Epaimahaiaren balorazioaren arabera, lanaren tonu orokorrak baretasuna eta malenkonia erakusten du eta, egileak poesia tradizioan sakontzeko eta iraganeko balioak transmititzeko ardura erakutsi du, naturarekiko errespetuarekin eta bizitzako mina gainditzeko jarrerarekin batera.

Jabi Santa Cruz Agirre (Erandio, Bizkaia, 1963) haur hezkuntzako irakaslea da Portugaleteko Asti Leku ikastolan. Umeei zuzendutako lehen poesia liburua 2000. urtean argitaratu zuen, “Moko bilduma” (Ibaizabal) eta ondoren “Hiriko baratzean” (Pamiela, 2008) poesia liburua kaleratu zuen.

Cesar Ibáñez París (Zaragoza, 1963), filologoari eta idazleari dagokionez, Sorian bizi da aspalditik, eta bertan egiten du lan, Virgen del Espino Institutuko Hizkuntza eta Literatura irakasle gisa. Poesia eta kontakizunak idatzi ditu, eta, ondorioz, hainbat sari eta aipamen jaso ditu literatur sariketa garrantzitsuetan. Hainbat poesia liburu idatzi ditu eta bi eleberri ere argitaratu ditu: “Los frutos caídos”, (Umbriel, 2004) eta “La cueva de los diez acertijos”, (Everest, 2008).

Blas de Otero-Villa de Bilbao Saria, 2008an ezarri zuen Bilboko Udaleko Kultura eta Hezkuntza Sailak, poeta bilbotarraren ondarea kudeatzen duen Blas de Otero Fundazioarekin elkarlanean. Lehiaketaren helburua literatur sormena sustatzea eta Bizkaiko hiriburuko hiritarrei bertako egile azpimarragarrienetakoa hurbiltzea da. 6.600 euroko saria du modalitate bakoitzerako (gaztelania eta euskara).

Blas de Otero-Bilboko Hiria Poesia Sariaren pasa den edizioa, Toledon bizi den Elena Román Torres idazlearen “Esta dichosa ansiedad doméstica” lanak irabazi du. Euskarazko lanen artean, saria Karlos Santisteban Zimarro idazle bizkaitarraren “Oroimenaren lorratzak” poesia liburuak jaso zuen.

BLAS DE OTERO-BILBO URIA IV. POESIA LEHIAKETA

OINARRIAK

1. Blas de Otero Fundazioak eta Bilboko Udalak “Blas de Otero-Bilbo Uria” Nazioarteko IV. Poesia Lehiaketaren deialdia egin dute.

2. Nazionalitate eta leku guztietako idazleek har dezakete parte.

3. Bi modalitate jarri dira: euskarazkoa eta gaztelaniazkoa. Modalitate biotako batera aurkez daiteke obra bakoitza.

4. Modalitate bakoitzean 6.600 euro gordineko saria emango da. Diru-kopuru horri, indarrean dauden arau fiskalekin bat etorrita, nahitaezkoak diren atxikipenak aplikatuko zaizkio.

5. Lanak originalak, argitaratu gabeak eta, argitaratuz gero, aipatu beharreko saririk eta akzesitik lortu bakoak izango dira. (baldintza horiek guztiak epaia eman arte eskatuko dira). Ez dira orijinaltzat hartuko aukeratutako modalitatekoa ez den beste hizkuntza batetik itzulitako lanak. Lehiaketa honetara aurkeztu ostean, lana argitaratu edo sarituko balute, egileak egoera berri hori jakinarazi beharko die antolatzaileei nahitaez.

6. Lanen luzera, gutxienez 700 bertso-lerrokoa izango da, eta gehienez 1.000koa. Gaia, errima eta neurria libreak izango dira.

7. Lanak paperean aurkez daitezke edo udalaren web gunera bidaliz.
a) Paperean:
LAU kopia aurkeztuko dira, makinaz edo ordenagailuan idatziak tarte bikoitzarekin eta alde batetik bakarrik, gutunazal itxian eta egilearen inolako aipamen barik. Honako hauek bakarrik ipini behar dira: “Blas de Otero-Bilbo Uria IV. Poesia Lehiaketa”, aukeratutako modalitatea (euskarazkoa ala gaztelaniazkoa), eta izenburua edo lema. Aipatutako ale horiekin batera gutunazal itxi bat (plika) aurkeztuko da, honako datuekin kanpoko aldean:

• Izenburua.
• Lema edo izengoitia.

Gutunazal itxiaren barruan dokumentazio hau sartu behar da:
• Izen-abizenak eta helbide osoa.
• NANaren fotokopia (edo jatorrizko nazioko antzeko agiriarena, pasaportearena edo egoitza–baimenarena)
• Harremanetarako telefonoa.
• Egilearen ardurapeko aitorpena idazlana orijinala, argitaratu bakoa, beste lehiaketaren batean saritu gabea eta ez dela itzulpena jasoarazteko.
• Lanak Bilboko Udalean aurkeztuko dira: Barrainkuako Kultur Etxea, “Blas de Otero-Bilbo Uria IV. Poesia Lehiaketa”, Barrainkua kalea 5. 48009 Bilbo. Lanak aurkezteko epea 2011ko ekainaren 15ean amaituko da.

b) Udalaren web orriaren bidez:

www.bilbao.net/premioblasdeotero web-orrian www.bilbao.net/blasdeoterolehiaketa euskaraz, egileak idazkia bere datuekin bete eta saiakera PDF formatuan erantsi behar du.

8.- Hizkuntza modalitate bakoitzerako epaimahai bat egongo da eta epaimahaiok oinarri hauek interpretatu ahal izango dituzte beharrezkoa bada, baita jarduteko arauak finkatu ere. Sariak emateko edota, behar denean, eman gabe uzteko ahalmen osoa izango dute epaimahaiek. Epaimahaiaren erabakia apelaezina da.

9. Saritutakoek eurek joan beharko dute sari-banaketara, ekitaldira, horretarako jarriko den tokian, egunena eta orduan eta hauek ezinezkoa balute bertaratzea, ordezkoa bidaliko lukete. Sari-banaketa hori 2011ko urrian izango da eta egileek euskarri informatikoan aurkeztuko dute saritutako lana. Epaia Bilboko Udalaren INTERNETeko helbidean argitaratuko da: www.bilbao.net.

10. Blas de Otero Fundazioak eta Bilboko Udalak euren gain hartzen dituzte saritutako lanen ustiapen eskubideak, emandako sariaz gain ezer ordaindu barik, saria bera izango baita egingo den ordainketa bakarra eta osoa; horretarako egileek hitza ematen dute:
a. Edozein lur-mugartean saritutako lanak argitaratzeko, banatzeko eta salgai jartzeko eskubideak eperik gabe lagatzen dituztela, merkaturatze-sistema eta argitaratze-mota eta euskarri guztietarako.
Lagapen hori Bilboko Udalari eta Blas de Otero Fundazioari egingo zaio, epaia ematen denetik hasi eta urte biko eperako.
b. Udalak eta Blas de Otero Fundazioak eskumena izango dutela, euren kabuz edota argitaletxe pribatu zein publiko batekin egindako hitzarmenaren bidez, egoki deritzen hainbat argitalpen egiteko. Argitalpen bakoitzeko ale-kopurua ere erabakiko dute.
c. Udalak eta Blas de Otero Fundazioak eskumena izango dutela saritutako lanak beste hizkuntza batzuetara itzultzeko, jatorrizko hizkuntzakoak ustiatzeko eta erabiltzeko dituen eskubide berberekin.

11. Edozelan ere, saritutako lanak Blas de Otero Fundazioak edo/eta Bilboko Udalak esku hartu barik argitaratuz gero, hizki deigarrietan agertu beharko dute zein sari jaso duten.

12. Saririk jaso ez duten jatorrizko lanak ez zaizkie itzuliko egileei.

13. Lehiaketa honetan parte hartzeak arauok osorik onartzen direla esan gura du.

El País egunkariak, olerki-liburuen bilduma kaleratzen ari dela, ale bat eskaini dio Blas de Oterori eta  Benjamín Prado idazleak egin du hitzaurrea.

Eskertu egiten diogu El País egunkariari testua hemn argitaratzeko baimena eman izana.

Irakurri hitzaurrea